Biskota me tri ngjra që do ju mahnitin me pamjen që marrin, të shijshme e shumë të lehta për tu gatuar. Befasoni mysafirët dhe fëmijët tuaj me këto biskota kaq të mira.
Përbërësit:
- 1 e verdhë veze
- 125gr gjalpë (margarinë në temperaturë dhome)
- 1 gotë të çajit sheqer pluhur
- 1 pako sheqer vanilje
- 3 gota e gjysmë të çajit miell
- 2 lugë çaji qumësht
- kakao
Përgatitja:
Fillimisht në një enë kuzhine shtojmë gjalpin (gjalpin duhet ta lini të qëndrojë paraprakisht në temperaturë dhome, jo nga frigoriferi), më pas shtojmë të verdhën e vezës, sheqerin pluhur dhe sheqer vaniljen.
E përziejmë për pak sekonda këtë masë me lugë, shtojmë miellin gradualisht dhe e përziejmë mirë me duar derisa të fitojmë një brumë të butë (nëse brumi ende ju ngjitet për duar shtoni edhe pak miell).
Pasi e kemi bërë brumin e ndajmë në tri pjesë, një pjesë të brumit e lëmë më të madhe kurse dy pjesë të tjera që do ti bëjmë me kakao i ndajmë të barabarta. Më pas te njëra pjesë e brumit që i kemi ndarë në masë të barabartë shtojmë dy lugë e gjysmë të sheqerit kakao (lugë e mesme), ndërsa te pjesa tjetër e brumit vetëm një lugë të sheqerit kakao.
Tek secila pjesë e brumit me kakao shtojmë nga një lugë të çajit qumësht dhe më pas i ngjeshim me duar të dyja pjesët e brumit. Më pas e shtrijmë pjesën e bardhë të brumit me holluese dhe sipër saj vendosim pjesët e tjera të brumit me kakao, duke i bërë gogla ashtu siç e shikoni në foto.
Pasi i kemi vendosur biskotat në tepsi me letër kuzhine, i fusim në furrën e ngrohur më parë dhe i pjekim në 180 gradë C për 20-25 minuta. Biskota shumë të shijshme dhe shumë interesant në pamje.
Ju bëfshin mirë!