Jeni mësuar të hani vetëm pastat ravioli, por nuk do ta besoni se sa të shijshme janë në formë ëmbëlsirash. Përgatiten shumë lehtë dhe shpejt, bëhen të shkrifta nga brumi i butë e me një shije fantastike!
Përbërësit për ravioli:
- 1 vezë
- 70ml qumësht
- 40gr sheqer
- 1 lëvore limoni
- 40ml vaj
- kripë
- 300gr miell
- 1 lugë të çajit pluhur për pjekje (baking powder)
- krem vanilje ose reçel sipas dëshirës
- sheqer pluhur
Përgatitja:
Shtojmë në një enë kuzhine vezën, qumështin, sheqerin, lëvoren e limonit, vajin dhe pak kripë me maje të gishtave. I përziejmë mirë të gjithë përbërësit me tel kuzhine më pas shtojmë miellin ku e përziejmë së bashku me pluhurin për pjekje. E përziejmë masën fillimisht me lugë, e më pas e ngjeshim me duar derisa të fitojmë një brumë të butë.
Brumin e lëmë të qëndrojë për 30 minuta, më pas e vendosim në tavolinë të përmiellur dhe e ndajmë në pesë pjesë me anë të thikës në forma të barabarta ashtu siç e shikoni në foto. E hollojmë secilën pjesë me holluese, nëse e keni makinën për hollimin e brumit edhe më mirë.
Pasi i kemi holluar petat vendosim krem vanilje apo ndonjë reçel tjetër sipas dëshirës. Para se të vendosim petën tjetër sipër, e lagim pak me ujë petën e parë me anë të një brushe. U japim format sikur në foto dhe më pas i fusim në vaj për fërgim derisa të marrin ngjyrë të artë. I dekorojmë sipër me sheqer pluhur.
Ju bëfshin mirë!
Pergatitja e ilustruar me foto
