Sezoni i gështenjave, pse i nevojiten organizmit

Gështenja është një frut tipik i stinës së vjeshtës, shumë e dashur nga të mëdhenj e të vegjël, për shijen që ajo ka.

Sa e sa herë në mbrëmjet e ftohta, familjet mblidhen rreth një tavoline për të ngrënë gështenja të pjekura. Megjithatë përveç kënaqësisë së shijuarit, gështenja është gjithashtu një depo vlerash ushqyese.

Gështenjat janë të pasura me niseshte dhe fibra, ato gjithashtu kanë edhe një përqindje të lartë mineralesh, sidomos kalium, fosfor, magnez, kalcium dhe në një masë më të vogël, edhe hekur.

Kanë një përmbajtje të lartë kalorike e që karakterizohen po ashtu edhe nga një përqindje e lartë sheqeri, nga proteina me cilësi të mirë dhe nga prania e vitaminave C, B1, B2, PP dhe nga një yndyrë e ulët. Le të shohim bashkë të mirat që na jep ky frut dhe kuriozitetet rreth tyre:

Lodhja

Gështenjat janë shumë të mira për ata që vuajnë nga lodhja sezonale, e shkaktuar nga gripi dhe ftohjet e rënda. Janë të dobishme për të kapërcyer lodhjen mendore, mungesën e përqendrimit dhe stresin e fortë.

Shtatzënia

Gështenjat përdoren edhe gjatë shtatzënisë, falë përmbajtjes së tyre me acid folik, edhe në rastin e ndonjë anemie.

Shëndetësi dhe kozmetikë

Gështenjat përdoren edhe për mjekim të reumatizmës, përdoren si diuretikë natyralë, për uljen e enjtjeve dhe infektimeve të ndryshme. Ato përdoren edhe në përbërjen e shumë preparateve kozmetike për lëkurën e flokëve dhe fytyrës, për shkak të efekteve të tyre qetësuese në organizëm.

Disa këshilla se si ti pjekni gështenjat në furrë

Për të përgatitur gështenjat e pjekura duhet që të paktën t’i zhysni në ujë të ftohtë dy orë para gatimit, pastaj thajini. Për të siguruar që të mos plasin, bëjuni nga një të prerë të vogël në majë dhe shpërndajini në një letër gatimi, deri sa të marrin ngjyrën kafe të pjekjes.

Pasi të piqen lërini të qëndrojnë në një pecetë të thatë për disa minuta. Shërbejini të nxehta. Në qoftë se doni t’i ruani për më vonë, mund t’ua hiqni lëkurën, t’i vendosni në një qese për ushqime të ngrira dhe t’i konsumoni brenda pak ditësh. /pergatit.com